ЗАСЛАНКА, ЗАСЛОНКА, ЗАСАЎКА

З асноўнай семантыкай агню, печы непасрэдна звязана і сімволіка З., якая актуалізуе іх прадукавальныя і медыятыўныя функцыі, а таксама сімвалічна ўяўляе жыватворны агмень. Апладняльная, дабратворная моц агню высвечваецца ў рытуальным пасадзе на З. нявесты, у кармленні на ёй каровы.

Той жа станоўчы ўплыў агню ў спалучэнні з яго ачышчальнай накіраванасцю забяспечыў выкарыстанне З. у медыцыне і ветэрынарыі. З. як неадлучная частка печы разам з ёй сімвалізавала само хатняе вогнішча як цэнтральнае месца ў хаце і таму рэпрэзентавала ў народных павер’ях усю сялібу.

Разам з тым, адкрываючы і закрываючы чалеснікі рэальнай печы, З. набыла сімвалічныя функцыі абазначэння ўваходу на “той” свет з усімі шматлікімі варыянтамі гэтага матыву.

Адсюль выкарыстанне З. у мантычных і засцерагальных рытуалах, у абрадах з функцыяй выкрывання нечысці. У антрапаморфным кодзе з. прыпадабняецца роту чалавека, а ў кантэксце вяселля звязваецца з цнатлівасцю маладой.

Крыніца: http://rv-blr.com/dictonary/view/1812