КАЛЯСКА

У міфалогіях індаеўрапейскіх народаў з’яўляецца астральным сімвалам. Вобраз калясніцы Грымотніка (Індры ў ведыйскай міфалогіі, Тора ў германа-скандынаўскай, Пяркунаса ў літоўскай, Перуна ў славянскай) першапачаткова сімвалізаваў яго сувязь з сонцам.

На Беларусі шырока распаўсюджаны паданні пра закапаныя ў кургане ці гарадзішчы або затопленыя ў рацэ, возеры, балоце каляскі (карэты), часта залатыя. У некаторых паданнях сцвярджаецца, што гэта зрабілі шведы, французы ці сам французскі імператар Напалеон. У в. Обча Бабруйскага р-на апавядаюць пра залатую К., якую закапаў Напалеон у адным з вялікіх курганоў.

Паводле паданняў, закапана залатая каляска ў курганах блізу в. Сарокі-Берагоўцы Шчучынскага р-на . Блізу в. Болецк Гарадоцкага р-на ў кургане пад назвай Буда схаваная крытая фурманка (буда) забітага ваяводы, і калісьці нібыта на кургане можна было бачыць белую буду, запрэжаную тройкай белых коней.

На гары блізу в. Андрэеўшчына Дзяржынскага р-на, паводле падання, французы закапалі 100 “брык” (вазоў) золата. На гары блізу в. Драчкава Смалявіцкага р-на быццам бы ў час вайны са шведамі была закапана калясніца Пятра Вялікага з яго грашыма і каштоўнымі рэчамі. Вядома шмат паданняў, калі пеўня запрагалі ў вазок і вазілі зямлю, каб засыпаць змея.

Крыніца: http://rv-blr.com/dictonary/view/2412