СПРЫЯЛЬНЫ ЎПЛЫЎ ПОЎНI

У поўнi былi i станоўчыя моманты, якiя спрыялi некаторым справам: Адзначым, што майстры сваёй справы раiлi новую печку класцi ў самую поўню, каб яна доўга захавалася i не рассыпалася. У час поўнi раiлi зачынаць сяўбу, каб «калоссе» было поўным.

У днi поўнi сеялi зелянiну (без пладоў) i траву для жывёлы. Раслiны, пасеяныя ў гэты час, былi асаблiва пахкiмi. У некаторых рэгiёнах на поўню раiлi сеяць або саджаць «круглую» гароднiну: гарбузы, капусту.

Лiчылася, што яны вырастуць такiмi ж вялiкiмi, як месяцовая поўня. У дзень поўнi замаўлялi «лунацiкаў»: «Дай, Хрыстос, ноч, каб пачываць, а не хадзiць, не гуляць з заплюшчанымi вачамi месяцовымi начамi. Месяцу на небе стаяць, а рабу (iмя) у пасцелi ляжаць. Амiнь» . А яшчэ ў поўню раiлi распачынаць i працягваць дзеяннi, якiя маюць на мэце збiранне разнастайных запасаў, «каб усюды было поўна ўсякага дабра».

Аўтар: Аксана КАТОВIЧ, Янка КРУК, «Звязда».

Крыніца: http://www.belarustime.ru/belarus/nativeword/c49a660f8ef32988.html