КАЛЯДКІ

Калядкі - гэта маленькія выпечаныя вырабы з жытняга цеста з рознымі начыннямі. Іх выпякаюць звычайна да Каляд і частуюць імі калядоўшчыкаў. Калядкі ядуць і ў іншыя святочныя дні, а таксама падчас пастоў. Асабліва любяць іх дзеці. У залежнасці ад віду начынняў калядкі падаюць да супоў ці да гарбаты і малака.

ЦЕСТА ДЛЯ КАЛЯДАК

Інгрэдыенты:

2,5 шклянкі жытняй ці сумясі жытняй і пшанічнай мукі (у суадносінах 1:1), 1,5 шклянкі вадкасці (вада, малако, сыраватка і інш. у розных суадносінах), соль.

Падрыхтоўка:

З мукі, вадкасці і солі замясіць прэснае цеста і пакінуць яго на 20-30 мін, прычыніўшы сурвэткай. Затым раскачаць цеста ў джгут, нарэзаць на роўныя кавалачкі, раскачаць з іх на тонкія аладкі і надаць ім круглую ці авальную форму.

Пакласці начынне і зашчыпнуць ці проста захіліць краі, сфармаваўшы вырабы любой формы. Выпякаць у духавай шафе пры ўмеранай тэмпературы (200- 220°С).

Гарачыя калядкі вышмараваць растопленым маслам ці маслам са смятанай. Начынні для калядак могуць быць самыя разнастайныя - з садовых і дзікарослых ягад, садавіны, тварагу, морквы, бульбянога пюрэ, свежых грыбоў, каш і інш.