КАЛІ ЗАМУЧЫЛА НЕСПАННЁ

22.01.2008

БЯССОННІЦА.

У народным асяродку лічылі, што чалавек мог пазбавіцца сну, таму што ў хаце пасяліліся нячысцікі жаночага роду: Начніцы, Палуношніцы, Шчакаціхі-будзіхі і г.д. Каб дапамагчы чалавеку, які знямог ад бяссонніцы, народныя лекары раілі:

• не класціся спаць без малітвы, не перахрысціўшыся;

• пад падушку ці ў калыску дзіцяці неабходна пакласці асвечаную на Тройцу зеляніну;

• на парозе хаты пакінуць галінкі асвечанай вярбы;

• можна абкурыць ложак кменам або кропам;

• адным з эфектыўных сродкаў ад бяссонніцы лічыцца падушка, набітая пер’ем курэй з чужых падворкаў.

А яшчэ ў народзе ведалі: каб не “перадаць” сон са сваёй хаты, нельга аддаваць пасля заходу сонца хлебную лапату і жар са сваёй печы; люляць пустую калыску; пакідаць на ноч мокрыя пялёнкі ці адзенне на двары; ваду, якая засталася пасля купання дзіцяці, выліваць на двор.

Тым, каго турбавала бяссонніца,раілі зрабіць так: падысці да акна, пастукаць па шыбе сагнутымі пальцамі і сказаць:

“Гасподзь неба благаслаўляе, раб (імя) засынае. Гасподзь зямлю благаслаўляе, раб (імя) засынае. Гасподзь душу благаслаўляе, раб (імя) моцна спіць.Амін. Амін. Амін”.

ЗАМОВА НА СОН:

“Нашнік-нашнік, жалезны сашнік, адкуль прыйшоў, туды пайшоў, адкуль прыехаў, туды паехаў, адкуль прыляцеў, туды паляцеў. За марамі, за балатамі зарэзалі сем кабаноў, сем бараноў, сем бугаёў. Там кухары гатавалі, у скрыпачку ігралі, з раба (імя) нашнікі знімалі”.

Крыніца: http://www.ng.by/ru/issues?art_id=18934